Свiслач

Нацбанк не мае намеру адпускаць рубель у вольнае плаванне

"Мы не адпускаем рубель у вольнае плаванне", — заявіў першы намеснік старшыні праўлення Нацыянальнага банка Павел Калаур, адказваючы на пытанне дэпутата ў Палаце прадстаўнікоў 27 лістапада.
Паводле слоў П.Калаура, Нацбанк працуе ў строгай адпаведнасці з кірункамі грашова-крэдытнай палітыкі, зацверджанымі прэзідэнтам.

"Дапушчальныя ваганні беларускага рубля адносна долара ў памеры 2.100—2.200 рублёў за долар, — паведаміў П.Калаур. — Вы ведаеце, якая непрадказальная была дынаміка курсу долара да еўра. У гэтых умовах Нацбанк спрабаваў праводзіць згладжаную палітыку абменнага курсу, скіраваную на выключэнне рэзкага ўмацавання рубля або яго дэвальвацыю".

Першы намеснік старшыні праўлення Нацбанка зазначыў, што кірункі грашова-крэдытнай палітыкі Беларусі на 2009 год прадугледжваюць прывязку беларускага рубля да карзіны валют — долара, еўра і расійскага рубля. Паводле яго слоў, ваганні беларускага рубля да долара дапушчальныя ў межах 5%.

"Калі сітуацыя запатрабуе змянення дакумента, то яно будзе праводзіцца па ўзгадненні з прэзідэнтам і ўрадам, — сказаў П.Калаур. — Думаю, грамадзянам і юрыдычным асобам трэба вельмі ўважліва сачыць хаця б за прэс-рэлізамі Нацыянальнага банка, у якіх мы тлумачым сваю пазіцыю".

Крыніца: БелаПан