Свiслач

Беларускім гуртам забаранілі граць на радзіме. А цяпер на іх канцэрты за мяжой могуць не прапусціць слухачоў

Сёння ў Львове распачынаецца Міжнародны музычны фэст Be free. Фактычна — гэта фестываль сучаснай беларускай музыкі ў суседняй Ўкраіне. У фэсце бяруць удзел найбольш вядомыя беларускія гурты. Значная чвастка з іх ўжо некалькі год не можа выступаць на вялікіх пляцоўках на радзіме. Прычына - "неблаганадзейнасць".

Слухачы з беларусі спадзяваліся атрымаць задавальненне ад імпрэзы хоць бы па-за межамі краіны. Аднак як стала вядома, беларускія памежнікі ўзмацняюць дагляд на ўсіх пунктах пропуску на мяжы з Украінай. Таму можна чакаць, што частка "фанатаў" можа папросту недаехаць да Львова.

Такія меры прымаюцца па просьбе ўкраінскага боку, паведаміў БелаПАН часовы выканаўца абавязкаў начальніка прэс-цэнтра Дзяржаўнага пагранічнага камітэта Беларусі Ігар Шчацінін. Паводле яго слоў, у сваю чаргу ўкраінскія пагранічнікі таксама зробяць больш жорсткім кантроль у пунктах пропуску на сумесным участку мяжы. Дамоўленасць пра гэта была дасягнута падчас праведзеных нядаўна двухбаковых кансультацый.

Як зазначыў І.Шчацінін, пільнаму дагляду на прадмет выяўлення фактаў правозу наркотыкаў, іншых забароненых рэчаў, якіх-небудзь прадметаў для бойкі, напрыклад бейсбольных біт, будуць падлягаць грамадзяне, якія перасякаюць мяжу нават па "зялёным" канале. Асаблівая ўвага будзе нададзена групам грамадзян, якія едуць на фестываль.

Апрача таго, Дзяржаўны пагранічны камітэт Беларусі папярэджвае аб магчымых чэргах у пунктах пропуску на мяжы з Украінай у гэтыя выхадныя і рэкамендуе грамадзянам папярэдне цікавіцца наяўнай сітуацыяй у тым ці іншым месцы.