Свiслач

Сёння ў Мінску адбылася прэс-канферэнцыя, прысвечаная будаўніцтву гарадоў-спадарожнікаў сталіцы. Былі названыя прыкладныя даты, аб'ёмы будаўніцтва і кошты.

На першым этапе, які працягнецца да 2015 году плануецца апрабаваць тэхналогію будаўніцтва на базе Смалявічаў і Смалявіцкага раёну.

Там будуць збудаваныя 2 горады-спадарожнікі. Першы – шматкватэрная забудова (з інфраструктурай) на 10 тысяч чалавек у самім горадзе Смалявічы. Другі, у Смалявіцкім раёне, -- катэджная малапавярховая забудова на 14 тысяч чалавек.
Абодва гарадкі будуць узводзіцца разам з усёй супутнай інфраструктурай (пачынаючы ад камунальнай і да сацыяльна-культурнай).

Зручнасць пражывання ў гарадах-спадарожніках будзе не ніжэйшая а багата ў чым нават вышэйшая чым у сталіцы. У гэтым перакананы начальнік упраўлення горадабудаўніцтва Камітэта архітэктуры і горадабудаўніцтва Мінгарвыканкама Сяргей Казлоўскі.  Ён жа і прывёў прыкладны кошт Смалявіцкага праекту. Выдаткі на рэалізацыю задумаў у Смалявічах і раёне складуць 5,28 трыльёны рублёў. Гэта каля $1,76 мільярда ў эквіваленце.




Пры гэтым спадар Казлоўскі адзначыў, што кошты квадратнага метра жытла у гарадах-спадарожніках будуць "супастаўнымі" з мінскімі коштамі на нерухомасць. А прывабліваць новых жыхароў плануецца пераносам вытворчасцяў, ільготнымі крэдытнымі лініямі на жытло і іншымі метадамі.

А калі дойдзе чарга да Пухавіцкага раёну.

У Рудзеску, які таксама зацверджаны як горад спадарожнік, работы пачнуцца не раней за 2016 год. У разе паспяховай апрабацыі "Смалявіцкай мадэлі", яна будзе прыменена і ў нас. А гэта азначае 2 пасёлкі: 1 шматпавярховая "гарадская" забудова, і другі – катэджны гарадок. Кошты ўзвядзення іншых гарадоў спадарожнікаў (а іх акрамя Смалявічаў – восем разам з Рудзенскам) будуць супастаўныя з пілотным праектам. Гэта азначае – інвестыцыі ў будаўніцтва на нашай тэрыторыі ў памеры не меней за 1 мільярд рублёў цягам 2016-2020 году.


У якасці ілюстрацый скарыстаныя здымкі каналу СТВ  генплану горада-спадарожніка "Смалявічы"